A radicalización da Revolución francesa
A Convención (1792-1794)
Tras a revolta popular de agosto de 1792, elixiuse por sufraxio universal masculino unha nova asemblea, chamada Convención. Dividiuse en dúas etapas:
Convención xirondina (1792-1793)
- Estaba dirixida por republicanos moderados.
- Proclamouse a república e executouse a Luís XVI.
- Formouse a Primeira Coalición contra Francia.
- Houbo un levantamento realista e ultracatólico.
Convención xacobina (1793-1794)
- Gobernaron os montañeses, liderados por Robespierre, tras un golpe de Estado.
- Aprobaron unha Constitución democrática e Robespierre implantou unha ditadura.
- Implantouse o Terror: as persoas sospeitosas de non apoiar a República podían ser condenadas a morte.
- Para frear a crise, estableceronse prezos máximos para os artigos de primeira necesidade e limitáronse os salarios.
- Creouse un novo calendario.
Robespierre e os seus seguidores foron guillotinados en 1794.
O Directorio e a fin da Revolución (1795-1799)
Para evitar unha nova ditadura, instaurouse un goberno moderado, que aprobou a Constitución de 1795 ou do ano III. O poder lexislativo era exercido por dúas cámaras (Consello dos Cincocentos e Consello dos Anciáns), e o executivo, por un Directorio integrado por cinco membros.
Tras superar dúas conspiracións, a Conxura dos Iguais e a revolta liderada polos realistas, produciuse o golpe de Estado de Napoleón o 18 de brumario e estableceuse o Consulado.
A Europa napoleónica
O Consulado
Napoleón acaparou o poder e en 1802 proclamouse cónsul vitalicio. Para modernizar o país, elaborou un código civil, creou o Banco de Francia e asinou un concordato coa Santa Sé.
O Imperio napoleónico
En 1804 o Consulado nomeou a Napoleón emperador hereditario. Desenvolveu unha política expansionista, logrou a hexemonía no continente e estableceu un bloqueo comercial a Inglaterra. En 1813 foi vencido en Leipzig por unha coalición entre Reino Unido, Prusia, Rusia e Austria. Abdicou en 1814 e Luís XVIII ocupou o trono de Francia.
A Restauración
Despois da derrota de Napoleón restauráronse as vellas monarquías e volveuse ao Antigo Réxime. Abolíronse as constitucións, as grandes potencias acordaron intervir noutro país se unha monarquía lexítima estaba ameazada e organizáronse congresos internacionais.
O Congreso de Viena e as alianzas internacionais
As principais potencias europeas reuníronse no Congreso de Viena (1814-1815) para garantir unha paz duradeira e evitar revolucións. Nel remodelouse o mapa de Europa. Tamén se crearon dous bloques distintos:
- A Santa Alianza (Prusia, Rusia e Austria) era antiliberal e os membros comprometíanse a defender o absolutismo.
- A Cuádrupla Alianza (Reino Unido, Prusia, Rusia e Austria, e Francia a partir de 1818, converteuse na Quíntupla Alianza) tiña un carácter militar.